မန္တလေးမြို့ရှိ အိုးဘိုထောင်တွင် မတ်လ ၂၈ ရက်နေ့က ငလျင်ဒဏ်ကြောင့် ၄ ဦးသေဆုံးခဲ့ပြီး ထိခိုက်ဒဏ်ရာ ပြင်းထန်သူများအား ဆေးကုသခွင့် ကန့်သတ်ခြင်းခံနေရကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)မှထုတ်ပြန်သည်။ ငလျင်ကြောင့် အိုးဘိုထောင်ရှိ အမျိုးသမီးအဆောင်များဖြစ်သည့် အဆောင်(၁)/(၂)နှင့် အမျိုးသမီးဆေးရုံဆောင်များပြိုကျပျက်စီးခဲ့ပြီး အမျိုးသားအဆောင်အလုပ်ရုံအပါအဝင် အဆောင်များနှင့် ကာရံထားသည့် အုတ်ရိုးများပြိုကျခဲ့သည်။ ထို့ပြင်ငလျင်ကြောင့် စိုးရိမ်ရသူ(၉)ဦးရှိပြီး ဆေးရုံတက်ရန်လိုအပ်သူ(၄ဝ)ကျော်ရှိသည်။ အချို့ထိခိုက်ဒဏ်ရာများသည် အကျဉ်းထောင်များတွင် ကုသရန်မလွယ်ကူ၍ ပြင်ပဆေးရုံသို့ ပို့ဆောင်ရန် လိုအပ်လျှက်ရှိသော်လည်း ကုသခွင့်မရပဲ ယနေ့အချိန်ထိ ကန့်သတ်ခံထားရကြောင်း PPNMမှထုတ်ပြန်သည်။ ထို့အပြင် ထိခိုက်ဒဏ်ရာရရှိသူများမှာ မိသားစုဝင်များနှင့် ဆက်သွယ်တွေ့ဆုံခွင့်မရသည့် အခြေအနေများလည်း ရင်ဆိုင်ကြုံတွေ့နေရသည်။ အိုးဘိုထောင်တွင် ဆေးဝါးလိုအပ်ချက်များစွာရှိနေပြီး အရက်ပြန်၊ဂွမ်း၊အနာကျက်ဆေးရည်၊ပတ်တီး စသည့် ဆေးဝါးပစ္စည်းများလိုအပ်လျှက်ရှိကြောင်း PPNMမှထုတ်ပြန်သည်...
မန္တလေးတိုင်း၊ မြင်းခြံမြို့နယ်တွင် နိုဝင်ဘာလ ၁၁ ရက်မှ ၁၈ ရက်အထိ ၇ ရက်တာ တိုက်ပွဲအတွင်း စစ်ကောင်စီ ဘက်မှ နှစ်ပွင့်ဗိုလ်အပါအဝင် ၃၆ ဦးသေဆုံးခဲ့ကြောင်း Myingyan Black Tiger (MBT)တပ်ဖွဲ့မှထုတ်ပြန်သည်။
မြင်းခြံမြို့တောင်ဘက် ၅ မိုင်ခန့်အကွာတွင်ရှိသော Myingyan Black Tiger (MBT)တပ်ဖွဲ့၏ စစ်ကြောင်း (၃) စစ်ရေးလှုပ်နယ်မြေအတွင်း ၂၀၂၄ ခုနှစ်၊နိုဝင်ဘာလ ၁၁ ရက်နေ့တွင် စစ်ကောင်စီတပ်မှ ထိုးစစ်ဆင်တိုက်ခိုက်ခဲ့သည်။
စစ်ကောင်စီတပ်မှ ထိုးစစ်ဆင်တိုက်ခိုက်မှုသည် ၃ ရက်တာကြာမြင့်ခဲ့ပြီး ခဲယမ်းပျက်တောက်မှုကြောင့် ပထမ ခံစစ်စည်းဖြစ်သည့် ကွမ်းစိုက်ကျေးရွာမှ ဆုတ်ခွာပေးခဲ့ရကြောင်း MBT တပ်ဖွဲ့ကထုတ်ပြန်သည်။
အလားတူ ၂ဝ၂၄ ခုနှစ်၊နိုဝင်ဘာလ ၁၅ ရက်နေ့တွင် စစ်ကောင်စီတပ်မှ ထိုးစစ်ဆင်တိုက်ခိုက်ခဲ့သည့်အတွက် နိုဝင်ဘာလ ၁၈ ရက်နေ့ထိ တိုက်ပွဲအပြင်းအထန်ဖြစ်ပွားခဲ့ကြောင်းသိရသည်။
ဌင်းတိုက်ပွဲအတွင်း စစ်ကောင်စီဘက်မှ Mi-35 ရဟတ်ယာဉ်ဖြင့် (၃) ကြိမ်နှင့် Jet Fighter ဖြင့် (၂) ကြိမ် စုစုပေါင်း လေကြောင်းတိုက်ခိုက်မှု (၅) ကြိမ်ပြုလုပ်ခဲ့ပြီး မြင်းခြံမြို့ရှိ ခမရ ၁၅ မှလည်း ဟောင်ဝှစ်ဇာ ၅ လုံးဖြင့် ပစ်ကူပေးခဲ့ကြောင်းသိရသည်။
MBT တပ်ဖွဲမှ ရဲဘော်များအနေဖြင့် စစ်ကောင်စီ၏ ကြည်းကြောင်းနှင့် လေကြောင်းတိုက်ခိုက်မှုကို ခုခံတိုက်ခိုက်နိုင်ခဲ့သော်လည်း ခဲယမ်းပျက်တောက်သွားမှုကြောင့် ဒုတိယခံစစ်စည်းဖြစ်သည့် ခြေဆေးကျေးရွာမှ ဆုတ်ခွာပေးခဲ့ကြောင်းသိရသည်။
ဌင်းနေရာများတွင် (၇)ရက်တာ တိုက်ပွဲအတွင်း စစ်ကောင်စီဘက်မှ နှစ်ပွင့်ဗိုလ်အပါအဝင် စစ်ကောင်စီတပ်သား (၃၆)ဦးသေဆုံး၊ (၄၃)ဦး ထိခိုက်ဒဏ်ရာရရှိခဲ့ပြီး MBT တပ်ဖွဲ့မှ ရဲဘော် (၁)ဦး ထိခိုက်ဒဏ်ရာရရှိခဲ့သည်။
စစ်ကောင်စီတပ်များသည် ယခုအချိန်ထိ စစ်ကြောင်းထိုးနေပြီး MBT တပ်ဖွဲ့နှင့် ညီနောင်မဟာမိတ်များမှလည်း ပြန်လည်ခုခံကာ စစ်ရေးအခြေအနေတင်းမာနေဆဲဖြစ်ကြောင်း MBT ကထုတ်ပြန်သည်။
(၇) ရက်တာ ခုခံစစ် တိုက်ပွဲတွင် Popa Guerilla Force (PGF)၊Bright Star Group (BSG) ၊မြင်းခြံခရိုင် တပ်ရင်း (၁ ၊၂ ၊ ၃ ၊၄၊၇ ၊၈) မြင်းခြံခရိုင် ပကဖ၊ နွားထိုးကြီးမြိုနယ် ပကဖ၊ အမှတ် (၈၁၅) ပြည်သူ့လွတ်မြောက်ရေးတပ်မတော် (PLA)၊ မြင်းခြံခရိုင် ဒရုန်းတပ်ဖွဲ (စွန်ရဲပြောက်ကျားတပ်)၊ SPY ပြောက်ကျားတပ်၊ နှလုံးလှ လူမိုက်တပ်ဖွဲတို့မှ ပူးပေါင်းတိုက်ပွဲဝင်ခဲ့ကြောင်းလည်း MBT တပ်ဖွဲ့မှ ထုတ်ပြန်သည်။
Photo - MBT
Comments
Post a Comment